மதராஸின் முதல் இஸ்லாமிய பெண்கள் கல்வி நிலையம்

வாலாஜா நவாப் குலாம் முகமது கவுஸ்.
இவரே கடைசி நவாப்.

இவரது துணைவியார் ஸ்ரீமதி பேகம் அஸீமா உனிசா.
இவர் காலத்துக்கு ஏற்ப பெண்கள் பரிணமிக்க வேண்டியதன் முக்கியத்துவத்தை உணர்ந்தவர்.
குறிப்பாக இஸ்லாமிய பெண்களும் ஆங்கிலக் கல்வி கற்க வேண்டும் என்ற தீவிர எண்ணம் கொண்டவர்.
அதன் விளைவு?
***
சேப்பாக்கம் மாளிகையில் இவர் முதல் ஆங்கிலப் பள்ளியை இஸ்லாமிய பெண்களுக்கு ஆரம்பித்தார். அதுவே மதரஸா - இ - ஆஸாம் பள்ளி.
அதை அவர் மவுண்ட் ரோட்டுக்கு மாற்றினார்.

மவுண்ட் ரோட்டில் தம் கணவர் தனக்காக விட்டுச் சென்ற மிகப் பெரிய நிலப்பகுதியில் அவரது மாளிகை இருந்தது.அதன் பெயர் உம்தா பாக்.

கி.பி 1901 ஆம் ஆண்டில் மதராஸில் நடந்த இஸ்லாமிய மாநாட்டில் கல்வியின் தேவை வலியுறுத்தப்பட்டது.

ஆனால் கி.பி 1918ல் தான் கல்லூரி முளை விட்டது.அப்போது அது இஸ்லாமிய மாணவ - மாணவிகள் இருவருக்கும் பொதுவாக இருந்துள்ளது.

கி.பி 1938ல் இருப்பதைந்து சதவீதம் பிற மதத்தினருக்கு இடம் தரப்பட்டது.

ஆனால் மீண்டும் கி.பி 1948ல் இது அரசு கலைக் கல்லூரி ஆகி, 1978ல் பெண்கள் கலைக் கல்லூரியாகி இன்று ”காயிதே மில்லத் அரசு பெண்கல் கலை அறிவியல் கல்லூரி” ஆனது.

தமிழகத்தின் முதல் பெண்கள் கல்லூரி - ராணி மேரிக் கல்லூரி

கல்வியில் சிறந்த தமிழ் தேசத்தில் முற்காலத்தில் பெண்கள் கல்வியில் சிறந்து விளங்கினர்.
மதுரை மூன்றாம் தமிழ்ச்சங்கத்தில் 49 பெண் புலவர்கள் இருந்த சான்று போதுமானது!
***
ஆங்கிலக் கல்வி மூலம் பட்டம் பெற்று உயரும் முறை பெண்களுக்குக் கி.பி 1910ஆம் ஆண்டு அறிமுகம் ஆனது.அதற்கான பேச்சுவார்த்தைகள் மேற்கொள்ளப்பட்டன.

மஹாகவி பாரதியார் இதற்கு ஒரு முக்கியமான உந்துதல் சக்தி என்பதை இக்காலத்துப் பெண்கள் மறக்கவே கூடாது.

இன்று நம்மூர்ப் பெண்கள் ஊர் விட்டு, தேசம் விட்டு வெளியேறி மிக உயர்ந்த வேலைகள் மூலம் பொருளீட்டும் கல்வியைக் கொடுக்கும் எண்ணம் 1910ஆம் ஆண்டில் விதைக்கப் பட்டதே!

கி.பி 1900ல் கர்னல் ஃப்ரான்ஸிஸ் கேப்பர் மரீனாவின் எதிர்ப்புறம் மிகப்பெரிய தோட்ட வீட்டைக் கட்டினார்.ஆனால் அவர் அதை விற்றுவிட, அவ்வீட்டில் கி.பி 1914ல் தமிழகத்தின் முதல் பெண்கள் கல்லூரி [ஆங்கில வழிக் கல்வி] ஆரம்பம் ஆனது.

அதுவே இன்று மரீனாவில் இருக்கும் ராணிமேரிக் கல்லூரி.

1914ல் இதன் பெயர் மதராஸ் பெண்கள் கல்லூரி.

பல ஆயிரம் மக்கள் வாழ்ந்த மதராஸில் வெறும் 37 பெண்கள் தான் சேர்ந்தனர்.

ஸ்ரீமதி டி லா ஹே என்ற ஐரோப்பிய பெண்மணியே முதல் முதல்வர்.

அவர் மூலம் அடுத்த அடுத்த ஆண்டுகளில் பல கட்டிடங்கள் உருவாகிக் கல்லூரி வளர்ந்தது.

மயிலாப்பூர் லஸ் சர்ச்

லஸ் கார்னர்

சென்னை வாசிகளுக்கு மயிலாப்பூர் பகுதியில் மிகவும் ப்ரபலமான போக்குவரத்து நெரிச்சல் மிக்க இடம்.

ஆனால் இதை எல்லாம் தாண்டி லஸ் சர்ச் அமைதியாகத் தன் பெருமையைத் தன்னடக்கத்துடன் உள் வைத்து நிற்கிறது.

தமிழகத்திலேயே இதையே மிக மூத்த ஐரோப்பிய கலைப்பாணி சர்ச் என்கிறார்கள்.

தரங்கம்பாடியில் கூட கி.பி பதினாறாம் நூற்றாண்டில் தான் டேனிஷ் சர்ச் வந்தது.

கி.பி பதினைந்தாம் நூற்றாண்டில் கேரளா வந்து கிறிஸ்துவத்தைப் பரப்பிய போர்த்துகீஸ் தேசத்து லெஸ்பர்ன் நகரப் பாதிரிகள் எட்டு பேர் தாமஸின் ஜீவ சமாதியை தரிசிக்க மரக்கப்பலில் பயணம் செய்து மயிலைப் பகுதிக்கு வந்த போது புயலில் மாட்டிக் கொண்டுள்ளனர்.

தெய்வாதீனமாகத் தாம் தப்பித்ததை எண்ணி அன்னை மேரிக்கு இங்குள்ள அடர்ந்த வனம் ஒன்றில் கூரைக் கொட்டகைக் கோயிலை எழுப்பினர்.அதுவே ”காட்டு மாதா கோயில்” என்று பல காலம் மதராஸ் மக்கள் அழைத்த லஸ் கார்னர் சர்ச்.

லஸ் என்றால் ”ஒளி”.

அன்னையின் அருளால் அறியாமை இருள் நீங்க வேண்டும் என்ற எண்ணத்தில் பாதிரிகள் அன்னையை ”லஸ் மேரி” என்றே அழைத்தனர்.

இன்றுள்ள சர்ச் கி.பி 1516 ஆம் ஆண்டு பெத்ரோ டே அடங்கியா என்ற பாதிரியாரால் எழுப்பப் பட்டது.

___________________________________________________________

ஆயிரம் விளக்கு மசூதி

மதராஸின் மிக முக்கியமான இடங்களுள் ஒன்று மவுண்ட் ரோட்டில் உள்ள 1000 LIGHTS MOSQUE - ஆயிரம் விளக்கு மசூதி.

இது ஒரு சட்டசபைத் தொகுதியும் கூட.

கி.பி 1785ல் ஆங்கிலேயரிடம் இருந்த இப்பகுதி முழுக்க அடர்ந்த மரங்கள் கொண்டதாக இருந்துள்ளது.

அதை வாலாஜா நவாப் அதீத விலைகொடுத்து வாங்கினார்.

அவ்விடத்தில் இருந்த தோட்ட மாளிகை ”மேயர் மெக்கேஸ் கார்டன்” எனப்பட்டது.

அதன் பெயரை நவாப் ”அஜிம் பாக்” என்று மாற்றித் தன் பேரன் அஜிமுக்கு வழங்கினார்.

அக்கட்டத்தில் தான் மதராஸின் இஸ்லாமியர் தம் தொழுகைக்கு நவாபின் மாளிகையை அடுத்து உள்ள இடம் ஒன்று தேவை என உணர்ந்து இன்றுள்ள ஆயிரம் விளக்கு மசூதித் தோட்டம் வாங்கப்பட்டது.

ஆனால் சில வரலாறுகள், புனித ஜார்ஜ் கோட்டை கட்ட, கடற்கரைவாழ் முஸ்லிம் மீனவர்தம் மதரஸா பள்ளி [அரபு மொழி, குரான் கற்றுக் கொடுக்கும் பள்ளிக்கூடம்] இடத்தை நாயக்க மன்னர் கொடுத்து, அதற்கு ஈடாக இப்பகுதியைத் தந்துள்ளார் என்றும் அறிகிறோம்.

கி.பி 1800ல் இப்பகுதியில் அழகிய இஸ்லாமியத் தொழுகை இடம் ஏற்பட்டுள்ளது. [1795 - 1801ஆம் ஆண்டுக்குள் ஷியா முஸ்லிம்களின் தொழும் இடமாக இது ஆனது]

ஆனால் இதனை அடுத்து எல்.ஐ.சி தாண்டி மிகத் தொன்மையான தர்க்கா ஒன்று மவுண்ட் ரோட்டின் இடது புறம் தினமும் பலர் வரும் ஸ்தலாக இருப்பதையும் அறிக.

அக்காலத்தில் பாரத தேசத்தில் அனைத்து சமய வழிபாட்டு ஸ்தலங்களிலும் விளக்கேற்றித் தான் வழிபட்டனர்.

மொஹரம் திருநாளில் நவாப் முன்னிலையில் 1008 விளக்குகள் இரவில் ஏற்றப்பட்டு வழிபாடு நிகழ்ந்தது. அதனால் இப்பகுதிக்கு ஆயிரம் விளக்கு மசூதி என்று பெயர்.

சில அரசு குடும்பத்து இஸ்லமையர் தம் கல்லறைகளும் இப்பகுதியில் உள்ளன.

மிக அழகிய கூம்பு வடிவங்கள் கொண்ட மசூதி தேசத்தின் இறையாண்மையை எடுத்துக் கூறுவதாக கம்பீரமாக இன்றும் மவுண்ட் ரோட்டில் நிமிர்ந்து காட்சி தருகிறது - missing 1000 lamps.

பேரிஸ் கார்னர்

மதராஸின் மிக ப்ரபலமான இடம் பாரி முனை, மன்னிக்கவும் இதன் பெயர் பேரிஸ் கார்னர்.

இன்றைய வடசென்னையின் துறைமுகத்தின் எதிரில் ப்ராட் வே [நேதாஜி சுபாஷ் சந்த்ர போஸ் சாலை] ஆரம்பம் ஆகும் முனையில் வலது புறம் அழகிய பேரி கட்டிடம் உள்ளது.

1780 ஆம் ஆண்டில் வேல்ஸ் தேசத்தில் இருந்து மதராஸுக்கு வந்த தாமஸ் பேரி இந்த உரம் நிறுவனத்தை ஆரம்பித்தார்[ ஜூலை 22 ஆம் நாள், 1788 ]. தென் தேசத்தின் மண் வளத்தைக் கொள்ளை கொண்ட செயற்கை உரத்துக்கு வரவேற்பு தந்த நாள்.

தென் பாரதத்தில் அதிக அளவில் செயற்கை உரத்தை அறிமுகம் செய்து மண்ணைக் கெடுத்த மகத்தான பெருமை இவருக்கே உண்டு!

துறைமுகம் மூலம் செயற்கை உரம் மூட்டை மூட்டையாகக் கப்பல்களில் வந்து இறங்கி முதலில் வரும்படி, சாலையின் முதல் கட்டிடமாக இது அமைகிறது.

கத்தீட்ரல் சாலையில்....[St.George Church] - 1815 A.D

மதராஸின் கோட்டையுள் வாழ்ந்த கவர்னர்களும் வைஸ்ராய்களும் உயர்குடி ஆங்கில மக்களும், நம்மூர் மதம் மாறிய அன்பர்களும் கூடும், ப்ரார்த்திக்கும் ப்ரம்மாண்டமான சர்ச் தான் இன்று ஜெமினி பாலத்தின் கீழ் அமெரிக்கன் தூதரகத்தின் அருகில் இருக்கும் புனித ஜார்ஜ் சர்ச்.

இதையே ”கத்தீட்ரல்” என்கிறார்கள். இதனால் இச்சாலை கத்தீட்ரல் சாலை ஆனது.

சுமார் 201 ஆண்டுகள் வயதான சர்ச் இது.

அக்காலத்தின் மிகப்பெரிய லாட்டரிப் பரிசுத் தொகையைக் கொண்டு எழுப்பப் பட்ட சர்ச் இது.

மிக ப்ரம்மாண்டமான ஆர்கன் பைப் இசைக்கருவிகள் சர்ச்சில் அவசியம் பார்க்க வேண்டிய ஒன்று.

பல தேசத்தில் இறந்தவர்களின் தகவல்கள் அழகிய கல்வெட்டுக்களுடன் கூடிய பளிங்குக்கல் வேலைகளுடன் சுவர்களிலும், தரையில் நிறைந்துள்ளன.

ஆங்கிலேய உயர் அதிகாரிகள், மதராஸின் பணக்காரக் கிறிஸ்துவர்கள், அலுவலர்கள், வீரர்கள் போன்றோர் தம் புகழ்ச் சான்றிதழ் அவர்தம் மரணத்திற்குப் பின் பதிக்கப் பட்டுள்ளன.

”இவர் தன்னுடன் சேர்ந்தவர்க்கும் சுற்றத்தவர்க்கும் நன்மை செய்து, அவர்தம் நன்மதிப்பைப் பெற்றுள்ளார்” என்ற வாசகம் தனிமனித வாழ்வின் பொருளை விளக்குகிறது.

மிக உயர்ந்த வெண்மையான தூண்கள், அழகிய உயர்ந்த கோபுரம், கடிகாரம், பலி பீடம், மணி, அழகிய பித்தளைக் கழுகுச்சிலை [ஆங்கிலேயரின் ஆளுமையின் அடையாளம்], தொங்கும் அழகிய சர விளக்குகள், மின் விசிறிகள் மற்றும் பல அழகிய பொருட்களைக் காண்கிறோம்.

வண்ணக் கண்ணாடிகள், ஏசுவின் ஞானஸ்தானம் வரையப்பட்ட கண்ணாடிகள் கவனத்தை ஈர்க்கும்.

கருவறைப் பீடத்தில் உள்ள புனித சிலுவை நம்மூர் உற்சவ மூர்த்திகளின் ஆதார பீட அமைப்பைப் போல் மிக நுட்பமான வேலைப்பாடுகள் கொண்டவை.இங்கு தான் செய்யப்பட்டிருக்க வேண்டும். சர்ஜன் கர்னல் கார்னிஷ் அதை தானம் செய்துள்ளார்.

கடிகாரம் கிழக்கிந்தியக் கம்பெணியால் 1828ல் அளிக்கப் பட்டதாம்.

1871ல் ஆறு கனமான மணிகள் கிறிஸ்துமஸ் நாளன்று இங்கிலாந்தில் இருந்து கொண்டு வந்து பொருத்தப்பட்டது.

சர்ச்சில் பணியாற்றும் ஒரு பணியாளர் மூதாட்டி சில இடங்களை அவசியம் பார்க்கச் சொன்னார்.அவருக்கு நன்றி!

புனித மேரி தேவாலயம் - ஆஸியாவின் முதல் ஆங்கிலப் பாணி சர்ச்

செப்டம்பர் மாதம் நாள், 1662 வருடம்
எட்வர்ட் விண்டர் மதராஸ் கோட்டையின் உயர் அதிகாரியாகப் பொறுப்பு ஏற்றார்.
***
உணவுக் கூடத்தில் தம் சகாக்கள் ப்ரார்த்தனை செய்வதைக் கண்டார், மனம் பொறுக்கவில்லை.

அவரது உத்தரவின் பேரில் மரத்தால் ஆன சிறிய அழகிய தொழுகை இடமும் மருத்துவமனையும் கட்டப்பட்டன.

அந்த தொழுகைக் கூடமே புனித மேரி சர்ச்சின் விதை ஆகும்.

அவ்விடமே புதன் - சனிக் கிழமைகளில் கவனர் மற்றும் பிற தலைவர்கள் கூடி முக்கிய வழக்கை விசாரிக்கும் இடமும் ஆயிற்று.

அவ்விடமே பின்னர் முதல் ஆங்கிலப் பள்ளியும் ஆயிற்று.

பாரத தேசத்தில் காலடி வைத்த மேற்கத்தியரும் நம்மூர்க் கோயில்களின் பயன்பாட்டை அறிந்தனரோ?

1678 - 1680 ஆம் ஆண்டுகளில் கம்பெனியின் ஆதரவு இன்றி கோட்டைக்குள் இருக்கும் அதிகாரிகளும் பணியாளர்களும் இணைந்து நிதி திரட்டி மிக அழகிய புனித மேரி சர்ச்சை உருவாக்கி விட்டனர். ஆஸியாவின் முதல் ஆங்கிலப் பாணி சர்ச் இதுவே!

அழகிய நீண்ட உயரமான சர்ச் கோபுரம் கி.பி 1701ல் எழும்பியது. அதன் உச்சிக் கலசத்துக்குப் பொன் பூசும் பணி 1710ல் நிகழ்ந்தது.

ஸ்ட்ரெயின் ஷாம் மாஸ்டர் என்ற அதிகாரி இதன் பொறுப்பை ஏற்றுக் கொண்டாராம்.

படையெடுப்புகளுக்கு அஞ்சி சர்ச்சையே ஒரு கோட்டை போல் தான் எழுப்பினர்.அதை வடிவமைத்தவர் கோட்டையின் பீரங்கிப் படைத் தலைவர் வில்லியம் டிக்ஸன்.

ஆனால் 1746ல் ஃப்ரெஞ்ச் கோட்டையைக் கைப்பற்றிய போது சர்ச் சேதமானது.

புனித மேரி கருவுற்ற நன்நாளில் சர்ச் பயன்பாட்டுக்கு வந்துள்ளது.

போரில் இறந்தோரின் வீர மரண மெய்கீர்த்திகள், வாழ்ந்து போனவர்கள் பற்றிய குறிப்புகள் ஆகியன கல்லறைச் சான்றிதழ்களாக மிக அழகிய வேலைப்பாட்டுடன் உள்ளன. தமிழ், லத்தீன், ஆங்கிலம் ஆகிய மொழிகளில் அவை உள.

பதினேழாம் நூற்றாண்டைச் சார்ந்த ஃப்ரெஞ்ச் ஓவியம் - ஏசுவின் இறுதி விருந்து மிக நேர்த்தியாகக் கருவறையில் உள்ளது.அதன் கீழ் புனித சிலுவை, பலி பீடம், மெழுகு வர்த்திகள் உள. ஒவ்வொன்றும் ஒரு தனி அதிகாரியின் கொடையாகும்.

கோட்டையின் முதல் பாதிரிமார் முதலான கிறிஸ்துவப் பாதிரிகளின் பெயர், ஆண்டு பதிவாகி உள்ளன.

பதினெட்டாம் நூற்றாண்டின் முதலில் இருந்து ஞானஸ்தானம் பெற்ற கிறிஸ்துவர்தம் பெயர்கள், முகவரிகள் உள்ள பதிவேடும் பார்வைக்கு உள்ளது.

இந்தியர் தம் மரியாதையை அதிகம் சம்பாதித்த தாமஸ் மன்ரோவின் கல்லறை உள்ள இடம் இது தான்.

அழகிய காணிக்கை பேழை, பளிங்குக்கற்களில் மேற்கத்திய கைவண்ணம், மிக அழகிய விரிந்த கூடம், விலாசமான ஜன்னல்கள், மாடிப்படிகள், கலைச்சிற்பங்கள், புனித ஞானஸ்தானத் தீர்த்தம் உள்ள கருங்கல் ஆகியன உள, கண்டு களிக்க வேண்டும்.

கோட்டைக்குள் முதல் கல்யாணம்...
அழகிய இவ்விடத்தில் தான் அமெரிக்காவின் ஏல் பல்கலைக்கழகத்தை உருவாக்கக் காரணமான எலிஹூ ஏலில் கல்யாணம் நிகழ்ந்தது.அதுவே கோட்டையுள் நிகழ்ந்த முதல் கல்யாணமாம்.

முதல் விதவைக் கல்யாணம்...
சென்னைக்குள் தீக்குளிக்க நிர்பந்தம் செய்யப் பட்ட ஒரு விதவையைக் காப்பாற்றிக் கல்யாணம் செய்து கொண்ட அதிகாரி ஜாப் சார்னாக்.கொல்கத்தா நகரை உருவாக்கிய ஜாப் சார்னாக்கின் மூன்று பெண்களும் இங்கு தான் ஞானஸ்தானம் பெற்றனர்.இவரது கல்யாண தினத்தின் நினைவாக அழகிய கருங்கல் மற்றும் மரவேலைப்பாடு கொண்ட தீர்த்த பாத்திரம் இவரால் சர்ச்சுக்கு அளிக்கப்பட்டுள்ளது.

மதராஸ் கோட்டை என்றவுடன் நினைவில் கண்முன் வரும் உயரமான கொடி மரமும் புனித மேரி சர்ச்சும் பார்க்க வேண்டிய வரலாற்றுச் சின்னங்கள்.

மதராஸ் ட்ராம்

இன்று கொல்கத்தா மாநகரத்தில் மட்டுமே காணப்படும் ட்ராம் போக்குவரத்து முதன்முதலில் மெட்ராஸில் தான் [1877 A.D] அறிமுகம் ஆனதாம்.

முதன்முதலில் குதிரைகள் இழுக்கும் சிறிய ட்ராம்கள் இருந்துள்ளன.

பின்னர் 7.5.1895 அன்று முதல் மின்சார ட்ராம் வண்டி மதராஸில் ஓடியதாம்.அதன் பின் தான் லண்டனில் மின்சார ட்ராம் வந்துள்ளது.

சென்ட்ரல், புரசைவாக்கம், மயிலை, திருவல்லிக்கேணி, மவுண்ட் ரோட், ராயபேட்டை, பேரிஸ் கார்னர், வண்ணாரப்பேட்டை ஆகிய பகுதிகளை இப்போக்குவரத்து இணைத்துள்ளது.

சென்ட்ரல், ப்ராட் வே ஆகிய பகுதிகள் - துறைமுகம் இடையே அதிக ட்ராம் போக்குவரத்து நிகழ்ந்ததாம்.

ஒரு நாளில் ஒரு லட்சம் மக்கள் பயணம் செய்வராம்.ஆனால் இதனால் ஆங்லியேயருக்கு அதீத பொருட்செலவு தான் ஆகியுள்ளது.

எத்தனையோ தனியார் நிறுவனங்கள் எடுத்து நடத்திப் பார்த்தும் லாபக் கணக்கு கொண்டுவர இயலவில்லை.

இறுதியில் 11.4.1953ஆம் தேதி இரவுவோடு கடைசி ட்ராம் ஓட்டப் பட்டு ஒரு முற்றுப்புள்ளி வைக்க வேண்டியதாயிற்று.

மதராஸப் பட்டிணம் திரைப்படத்தில் ட்ராம் வண்டிகள் காட்டுகிறார்கள், இன்று கொல்கத்தாவில் ட்ராம் போக்குவரத்து பயன்பாட்டில் உள்ளது.

எக்மோர் ரயில் நிலையம்

மதராஸின் சென்ட்ரல் ரயில் நிலையம் உருவான பின்னும் தேசத்தின் பல பகுதிகளை ரயில் மூலம் இணைக்க வேண்டிய கட்டாயம் ஆங்கில அரசுக்கு ஏற்பட்டது. அதற்கான ஒரு திட்டம் தீட்டினர்.

எழும்பூரில் எக்மோர் ரீடெளட் என்ற சிறிய கோட்டை ஒன்று இருந்தது.அது ஆங்கிலேயரின் பயன்பாட்டிலும் இருந்தது.ஆனால் அவ்விடம் Dr.பால் ஏண்டி என்பவரது சொந்த நிலம் ஆகும்.

முதலில் தன் சொத்தை விற்க மறுத்த ஏண்டி ரூ.100,000 [அடேயப்பா!] தொகையைப் பெற்றுக் கொண்டு விட்டுக்கொடுத்த இடத்தில் கி.பி 1905ல் திட்டம் உருவாகி கி.பி 1908ல் ரயில்வே நிலையம் உருவானது.

தலை சிறந்த கட்டிடக் கலைஞர் ராபர்ட் சிஸ் ஹோம் மாதிரி வரைப்படம் தயாரிக்க, திரு.சாமிநாதப்பிள்ளை இதைக் கட்டினார். ரூ.1.7 மில்லியன் செலவனாதாம், காரணம் மிக உயர்தர சிற்றுண்டிச் சாலை, ஓய்வு அறைகள், ரயிலின் பெட்டி அருகிலேயே கார் நிற்கும் வசதி என உயர்தர வசதிகள் இருந்தன. 11.6.1908ல் மக்கள் பயன்பாட்டுக்கு எழும்பூர் ரயில்நிலையம் வந்தது.

ராபர்ட் க்ளைவ் பெயரில் ரயில் நிலையத்தைத் திறக்க அரசு முற்பட மக்கள் எதிர்த்தனர்.எக்மோர் என்ற பெயர் தான் வேண்டும் என்று அடித்துக்கூறி இன்று வரை அப்பெயர் நிலைக்க அக்கால மதராஸ் வாசிகள் ஏற்பாடு செய்து விட்டனர்.

கி.பி 1935ல் இதைப் பார்வையிட்ட மேலை தேசத்தவர் ”ஆஹா லண்டன் சேரிங் க்ராஸ் நிலையத்தை விட பெரிய ப்ளாட்ஃபார்ம்கள் இருக்கிறதே!” என்று வியந்தனராம்!

Kings of Presidency College --- மதராஸ் ப்ரெஸிடென்ஸிக் கல்லூரி...

கி.பி 1820ல் மதராஸின் தலைசிறந்த, மக்கள் பெரிதும் மதித்த ஸ்ரீமான் தாமஸ் மன்ரோ மதராஸின் கல்விப் பணிகளில் ஆங்கில அரசு அதீத கவனம் செலுத்த வேண்டும் என்ற ஆணித்தரமான கொள்கையை முன்வைத்தார்.அவருக்குப் பின் கி.பி 1840ல் தான் எல்ஃபின்  ஸ்டோன் கவனராக வந்த போது கேம்ப்ரிட்ஜ் பல்கலைக்கழகத்தின் கணிதப் பேராசிரியரை இந்தியாவுக்கு வரவழைத்தார்.அவர் பெயர் E.B . போவெல்.இவரை முதல்வராகக் கொண்டு கல்வி நிறுவனம் அமைக்க ஆங்கிலேயர் திட்டமிட்டனர்.அவரும் மும்பை வந்தார், ஆனால் பல காரணங்களால் அவரால் பயணத்தைத் தொடர இயலாமல் போனது.

இதனால் ஆங்கிலேயர் கூப்பர் என்ற பேராசிரியரை கொல்கத்தா ஹூக்லி கல்லூரியில் இருந்து மதராஸுக்கு அழைத்தனர், அவரும் மகிழ்ச்சியுடன் வந்தார்.

அவரது தலைமையில் எழும்பூர் பகுதியில் எடின்பர்க் ஹோம் என்ற வாடகை வீட்டில் ப்ரெஸிடென்ஸி பள்ளி 15.10.1840ல் தொடங்கப்பட்டது.மதிப்பு மிக்க மதராஸ் பல்கலைக்கழகத்து முன் தோன்றிய பெருமை ப்ரெஸிடென்ஸிக் கல்லூரிக்கு உண்டு.

சிறிது காலத்தில் மும்பையில் இருந்து E.B.போவெல் மதரஸுக்கு ஒருவழியாக வந்தார், அப்போது அவரைக் கொண்டு அப்பள்ளி மேல்நிலை வகுப்புகளுடன் விஸ்தாரம் ஆனது.ஆனால் 1841ல் ப்ராட்வேக்குப் பள்ளி மாற்றப்பட்டது.

படிப்படியாக அப்பள்ளி வளர்ந்து கல்லூரி ஆனது, அதன் பின் இன்று மரீனா கடற்கரையில் கி.பி 1870ஆம் ஆண்டில் புதிய அழகிய விஸ்தாரமான கட்டிடத்தில் குடிபுகுந்து இன்று வரை பல லட்ச மாணவ மணிகளை தேசத்துக்கு உருவாக்கி வருகிறது, பல உயர்ந்த ஆசான்கள் மூலம். உ.வே.சாமிநாத ஐயர், Dr.ராதாக்ருஷ்ணன் போன்றோர் இதில் பணியாற்றியுள்ளனர்.

மதராஸின் பல ப்ரம்மாண்டமான கட்டிடங்களைக் கட்டியவர் ராபர்ட் சிஸ் ஹோம். அவர் முதன்முதலில் இக்கலூரிக் கட்டிடத்தின் மாதிரை வரைப்படத்தை உருவாக்கிக் கொடுத்து அப்போட்டியில் முதல் பரிசு பெற்றார்.அப்போது அவர் பெற்ற பரிசுத் தொகை ரூ.3000. அப்பப்பா...கி.பி 1864ல் இப்போட்டி நடத்தப்பட்டு, கட்டிடம் ஆரம்பம் ஆயிற்று.

இக்கல்லூரியில் இடம் கிடைத்துப் படிப்பது என்பது ஒரு அந்தஸ்தாகவே இன்றும் மக்கள் கருதுகின்றனர்.